Stroganoff í sinnepssósu

Umsögn

Fann þetta á netinu. Kom á óvart. Líklega ekki einskorðað við Stroganoff – örugglega hægt að gera þetta með gúllasbitum/stirfry kjöti líka.

Innihald

700 gr. Stroganoff
salt og pipar
3 msk smjör
2 msk hveiti
2 bollar nautakraftur (2 bollar sjóðandi vatn + 2 kjötteningar)
2 msk Dijon sinnep
1/4 bolli sýrður rjómi
1 msk ólívuolía
1/2 laukur, niðursneiddur
1/3 bolli asíur (má sleppa)
450 gr. eggjanúðlur
Söxuð steinselja (til skreytingar)

Aðferð

Stroganoffið skorið í bita. Smjör og ólívuolía brædd á pönnu, kjötið sett á pönnuna og steikt ásamt söxuðum lauk og saltað og piprað eftir smekk (ég setti hvítlauk líka – má sleppa). Ef asíur eru notaðar (sem ég notaði ekki) eru þær settar í eftir að kjötið hefur steikst í 3-4 mín. Eftir steikingu er kjötið tekið frá og haldið heitu.
Eggjanúðlurnar settar í sjóðandi vatn og soðið eftir leiðbeiningum á pakkanum.
Smjör brætt á pönnunni, hveiti hellt varlega út og hrært vel. Sama með kjötkraftinn. Soðið í 1 mínútu og svo sinnepið og rjóminn sett út í. Soðið í 2-3 mínútur. Eftir þetta er þetta bragðbætt eftir smekk með því sem er til í kryddskápnum. Mér fannst vanta smá fyllingu (fer kannski eftir kjötkraftinum sem notaður er) og bætti við cayenne pipar, laukduft og papriku.

Tilvísun

Stolið og staðfært héðan.

Hunangs-sinneps kjúklingabitar í brauðraspi

Umsögn

Einfalt í innkaupum og undirbúningi. Vinsælt hjá stórum sem smáum.

Innihald

2 kjúklingabringur (þiðnar)
sinnep (t.d. Dijon eða venjulegt)
hunang
brauðraspur
salt og pipar
ólífuolía
(kannski hafa með einhverja sterka chili-sósu eða e-ð slíkt)

Aðferð

Hitið ofninn í 200 gr. celsius (400F). Skerið bringurnar í þunna strimla (á stærð við litlafingur eða svo) og kryddað með salti og pipar eftir smekk.
Blandið saman (í skál) nokkrum matskeiðum af sinnepi og jafn mörgum matskeiðum af hunangi og blandið vel saman. Setjið brauðrasp í aðra skál. Veltið kjúklingnum upp úr blöndunni og síðan upp úr raspinum.
Ef þið viljið getið þið steikt bitana í olíu á pönnu í 2 mínútur þar til þeir eru gullin-brúnir (passa að brenna ekki). Við sleppum reyndar oft að steikja og bökum bara (minna bras og maturinn hollari fyrir vikið). Setjið bitana svo á smjörpappír og í eldfast mót og bakið í miðjum ofni í um 15 mínútur.
Við borðum þetta yfirleitt bara með salati og hrísgrjónum en höfum oft hugsað að það gæti verið sniðugt að hafa e-s konar sterka chili-sósu eða eitthvað með. Látið bara ímyndunaraflið hlaupa með ykkur í gönur. 🙂

Picnic lambakjötbollur

Umsögn

Venjulega höfum við búið til kjötbollur úr nautakjöti en við rákumst á þessa uppskrift í einni bókinni okkar og myndin leit svo girnilega út… 🙂

Innihald

250gr lambahakk
4 hvítlauksgeirar (við sleppum þessu yfirleitt)
1/4 tsk þurrkað tarragon
1/3 bolli brauðraspur (heilhveiti ef hægt er)
1 stór eggjarauða eða eggjahvíta (ég notaði bara heilt egg)
1,5 msk tómatsósa
1,5 matskeið fitusnautt nautasoð (má nota vatn í staðinn)
salt og nýmalaður pipar
2 msk ólífu olía
parsley

Aðferð

Í stórri skál blandið saman lambi, söxuðum/pressuðum hvítlauk, tarragon, brauðraspi, eggi, tómatsósu og soði. Kryddað með salti og pipar eftir smekk.
Hræra vel og móta litlar bollur úr deiginu, steikja á pönnu við vægan hita og snúa reglulega þannig að brúnist jafnt á öllum “hliðum” – ca. 7 mínútur.
Að steikingu lokinni sáldrið yfir smá parsley og brauðmylsnu ofan á áður en bollurnar eru bornar fram með kúskús (eða hrísgrjónum) og góðu salati. Bókin mælir einnig með hvítlauksbrauði (úr frönsku baguette) og að hafa einn sítrónubát með.

Tilvísun

Uppskrift heitir Picnic Lamb Meatballs With Garlic Toast og er úr bókinni Quick Cooking for Two.

BBQ Svínarif

Umsögn

Þessi réttur er mjög einfaldur í framleiðslu og mjög lítil þrif eftir matseldina. Gallinn er bara að uppskriftin miðast við suðu í hægsuðupotti í 3,5 til 6 klukkustundir. 🙂

Innihald

2 kg svínarif (country ribs) á beini (eða beinlaus)
1 lítill laukur fínt saxaður (1/2 bolli)
1/2 bolli tómatsósa
1/2 bolli “cider” edik (nota venjulega minna)
1/4 bolli púðursykur
1 msk salt
1 msk Worcestershire sósa
1 tsk malað chipotle chili powder (sleppi þessu venjulega)
1 tsk þurrkað oregano
(hendi venjulega einum-tveimur litlum tómötum ofan í)

Aðferð

Blandið öllu saman í hægsuðupottinn og hrærið rifjunum út í. Eldað á lágum hita í 6 klst eða á háum hita í 3,5 klst. Gott er að taka rifin úr pottinum og setja á broil í ofni þangað til rifin brúnast. Ég er venjulega of latur og ber þetta fram beint úr pottinum eftir suðu.
Borið fram með góðu salati og hrísgrjónum, pasta eða jafnvel kartöflum.

Tilvísun

Uppskrift frá Phoenix mömmu vinkonu Önnu sem við kynntumst í gegnum Stanford leikskólann.

Rautt kjúklingapasta

Umsögn

Einn af hversdags réttunum á þessu heimili – sá réttur sem Hrefna býr hvað oftast til þessa dagana, einfaldur og góður réttur.

Innihald

2 heil kjúklingalæri (og kannski 1-2 kjúklinga drumstick líka ef vill)
1 rauð paprika
2 gulrætur
1 laukur
1 stór dós af “crushed” tómötum
kjúklingasoð (má nota vatn í staðinn, en verður ekki jafn bragðgott) 🙂
krydd: Oregano og/eða Basil og/eða Parsley og/eða Thyme og/eða Dill
rifinn ost (t.d. parmesan)
ca 250gr. pasta

Aðferð

Þýða kjúklingalæri (ath: þarf ekki að vera þiðið í gegn), 2 duga fyrir okkur, kannski bæta við 1-2 kjúklingaleggi (“drumsticks”) ef vill.
Steikja lauk í olíu, bæta við gulrótum, og að lokum papríku í stórum súpupotti. Á meðan grænmetið steikist, skella kjúklingalöppunum á olíborna svörtu pönnuna og steikja þær aðeins (loka húðinni þar sem þú getur)
Á meðan kjúklingarnir steikjast, bæta við (í súpupottinn) heilli stórri dós af crushed tomatoes og svo 1-2 litlum fernum af kjúklingasoði. Það þarf nógu mikinn vökva til að fljóta yfir kjötið. Bæta við kryddi (möguleg krydd: Oregano, Basil, Parsley, Thyme, Dill – eftir smekk).
Ná upp suðu í súpupottinum og setja kjúklingana á kaf í sósuna. Hafa hitann á 4 (af 10) ca. (20 mín í) og pottinn OPINN svo soðið nái að gufa upp og sjóða í 20-30 mín.
Setja upp pastað í öðrum potti.
Taka kjúlinginn upp úr soðinu og skera kjötið af beinunum (kjúklingurinn er líklega ekki soðinn í gegn – mögulega ennþá svoldið blóðugt ef bara 20 mín suða, en það er allt í lagi því það fer aftur í soðið eftir að búið er að skera kjötið niður).
Þegar allt kjötið er kominn aftur í pottinn, hella slatta af rifnum osti/parmesan í pottinn og hræra. Þetta þykkir sósuna.
Blanda saman pasta og sósu í stóra skál. Bera fram með salati.

Tilvísun

Lauslega byggt á (en nokkuð mikið breytt) uppskrift úr bók eftir Art Smith.

Kjúklinga Alfredo Pasta Finns með sólþurrkuðum tómötum

Umsögn

Þetta er ein helsta uppáhalds pasta uppskrift fjölskyldunnar, ostafyllt pasta í rjómalagaðri Alfredo sósu með steiktum kjúklingabitum og sólþurrkuðum tómötum – nammi! 🙂
Flest allt í þessum rétt ætti að vera hægt að finna á hverju heimili (eða hjá nágrönnum) 🙂 – sólþurrkaðir tómatar eru kannski undantekning en þeim má sleppa þó mér finnist þeir ómissandi í þessum rétti. 🙂

Innihald

Ferskt Buitoni pasta með ostafyllingu
2 kjúklingabringur
Season-All krydd
Handfylli sveppir
1-2 rif hvítlaukur
Smjör
2-3 msk. hveiti
Rjómi
Kjúklingasoð/grænmetissoð (1 grænmetisteningur í soðnu vatni)
1/2 til 1 bolli Parmesan ostur
Sólþurrkaðir tómatar
Steinselja/Basil
Salt
Pipar

Aðferð

Skera niður og steikja sveppi og hvítlauk í smjöri. Setja á disk og geyma.
Skera kjúkling í bita (kubba), krydda með Season-All og steikja á pönnu. Geyma með sveppunum.
Sjóða pastað (passa að sjóða ekki of mikið, sjóða frekar aðeins of lítið en of mikið!), slökkva undir, sigta vatnið frá og geyma pastað í pottinum.
Á meðan pastað sýður, er kominn tími til að búa til Alfredo sósuna – bræða 2-3 msk. smjör á pönnu við vægan hita og hræra út í ca. tvær msk hveiti. Blanda út í rjóma, kjúklinga/grænmetissoði og parmesan osti eftir smekk og þykkju (getur stjórnað þykkjunni í sósunni með parmesanostinum).
Þegar sósan er orðin nógu þykk er sveppunum og kjúklingnum bætt út í ásamt sólþurrkuðum tómötum (skera niður tómatana í strimla ef stórir bitar). Krydda með basil/steinselju, salti og pipar (eftir smekk). Setja pastað út í (eða setja allt í pastapottinn) og leyfa pastanu að hitna aðeins.

Tilvísun

Uppskriftin er blanda af Alfredo réttum sem ég fann á Internetinu og löguð til eftir smekk.

Grillaður lax með dilli og appelsínum

Umsögn

Einfaldur og þægilegur hversdagsmatur – ef maður hefur aðgang að bæði grilli, dilli og lax (villtum ef ekki íslenskur). Dill er í miklu uppáhaldi hjá bæði Önnu og Hrefnu og því valdi ég þessa uppskrift til að prófa eitthvað nýtt. Uppskriftin er fyrir heilan lax en ég notaði reyndar bara nokkrar sneiðar og reyndi að haga uppskriftinni eftir því.

Innihald

heill lax, 1,5 – 2 kg
100 g smjör
1-2 appelsínur
2 msk saxað, ferskt dill
2 pressaðir hvítlauksgeirar
salt

Aðferð

Hreinsið og hreistrið laxinn. Stráið á hann salti að utan og innan. Skerið appelsínubátana í bita. Hrærið saman smjöri, dilli og hvítlauk. Smyrjið þykku lagi af smjöri á laxinn beggja vegna. Setjið litla smjörbita og appelsínubita inn í laxinn. Pakkið laxinum vel inn í álþynnu og setjið á grillgrindina. Snúið honum einu sinni meðan grilltíminn varir. Gott er að miða við 2 mín. á hvorri hlið fyrir hver 500 g (laxinn er til þegar hann losnar auðveldlega frá beinunum.). Ég hafði hann ca. 10 mín á hvorri hlið sem var auðvitað aðeins of mikið fyrir flökin sem ég notaði, en rétt að haga það eftir stærð fisksins sem þið grillið.
Berið laxinn fram með fersku salati og kúskús/kartöflum/hrísgrjónum – ég valdi kúskús. 🙂

Tilvísun

Uppskriftin er stolin og staðfærð af vefsíðu Eðalfisks.

Brauðmola-dumpling í laxasoði

Umsögn

Í efnahags-niðursveiflum er alltaf gott að rifja upp gömul húsráð og læra að nýta leyfar betur. Þessi uppskrift er endurgerð eftir minni af súpu sem Frau Wendel bjó til þegar hún kom í heimsókn til Íslands um árið og borðaði með fjölskyldunni í Byggðarendanum. Við suðum íslenskan lax fyrir þau og eftir matinn þvertók hún fyrir að henda soðinu og notaði það í staðinn sem forrétt daginn eftir. Ég fékk aldrei uppskriftina hjá henni en leitaði í staðinn á náðir bókarinnar Splendid Soups sem Hólmfríður og Óli gáfu okkur fyrir löngu síðan.

Innihald

Soð af laxi
Í bollurnar, skal hræra saman:
2 egg
1/8 bolli brauðmolar
svolítið af parmesan osti
svolítið af bræddu smjöri (ég notaði reyndar bara ólífuolíu)
pínulítið af nutmeg
Smá humar-base uppleyst í vatni (má sleppa)
salt
pipar

Aðferð

Soðið sett í pott og hitað. Á meðan soðið hitnar er öllu hinu blandað saman í skál og hrært vel (ég tók uppskriftina mátulega hátíðlega og slumpaði á allt saman). Þegar suðan er komin upp er gott að taka tvær matskeiðar og mynda litlar bollur úr “deiginu” og þær látnar detta ofan í soðið. Þetta er svo soðið í smá stund (1-2 mín).

Tilvísun

Stolið og staðfært úr bókinni Splendid Soups.

Krabbakökur

Umsögn

Fjölskyldufaðirinn er þekktur fyrir ást sína á skelfiski og því eru krabbakökur í miklu uppáhaldi. 🙂 Sumum fjölskyldumeðlimum þykir þó þetta kannksi helst til einhæft sem aðalréttur og því má vera að þetta sé betra sem forréttur. 🙂

Innihald

250 grömm krabbakjöt (ég hef notað imitation crab, kom ágætlega út)
1 egg
3 msk majónes
4 tsk sítrónusafi
1/8 tsk. þurrkaðar chiliflögur
1 tsk þurrkað tarragon
1 msk saxaður blaðlaukur (green onions/scallion)
1/2 bolli crushed buttery round crackers
1 tsk smjör

Aðferð

Hrærið saman eggið, majónesið, sítrónusafann, chiliflögurnar, tarragon og blaðlaukinn. Hrærið varlega krabbakjötið út í og reyna að brjóta ekki upp krabbakjötið of mikið. Myljið kexið út í, þangað til þykkjan er eftir smekk (ekki of blautt). 🙂
Hita smjör á pönnu á miðlungshita. Móta kökur úr deiginu (ekki of stórar) og steikja þangað til “golden-brown” á litinn, eða ca. 5-6 mínútur á hvorri hlið.

Tilvísun

Man ekki hvaðan þessi uppskrift kom 🙂 – líklega steypt saman úr nokkrum uppskriftum af Internetinu.

Uppskriftir

Sorry, this page is in Icelandic only…

Við vorum í vandræðum með hvar við ættum að geyma uppskriftir sem okkur áskotnast, þangað til okkur datt í hug að gera eins og allir aðrir; setja þetta bara á vefinn. Þetta er fyrst og fremst fyrir okkur þar sem okkur vantar oft innihaldslista þegar haldið er í innkaupaleiðangur eftir vinnu og maður nennir ekki að fara heim fyrst til að sækja listann – en ef þetta nýtist ykkur líka þá er það hið besta mál. 🙂 Þetta er svo sem engar Hótel Holt uppskriftir, bara svona meira hversdagsmatur…

Vonandi verða allar okkar uppskriftir komnar á vefinn á endanum, en þangað til er hér nasasjón af eldhús-leyndarmálunum okkar.

Njótið vel! 🙂

Forréttir

Krabbakökur
Brauðmola-dumpling í laxasoði

Aðalréttir

Grillaður lax með dilli og appelsínum
Kjúklinga Alfredo Pasta Finns með sólþurrkuðum tómötum
“Rautt kjúklingapasta”
BBQ Svínarif
Picnic lambakjötbollur
Hunangs-sinneps kjúklingabitar í brauðraspi
Stroganoff í sinnepssósu

Archives

Calendar

January 2010
S M T W T F S
 12
3456789
10111213141516
17181920212223
24252627282930
31  

Categories