Það hefur gengið örlítið brösuglega hjá mér að setja mig inn í ‘matskvarðapælingar’ því að mín verkefni eru yfirleitt ekki á ritgerðaformi (amk ekki ennþá). Þau verkefni sem ég set fyrir eru yfirleitt stutt reiknidæmi, og/eða spurningar þar sem beðið er um stuttar skilgreiningar á hugtökum/hlutum, og/eða beðið er um stuttan samanburð (“meiri líkur á villum ef a er notað frekar en b”, “a nýtir sendiafl ekki eins vel og b”).
Það er því erfitt að setja upp margorðaða matskvarða því að svörin eru yfirleitt rétt eða röng, reikniaðferðirnar réttar eða rangar.
Það sem ég hef gert er að útdeila stigum fyrir ákveðna hluti (Eitt stig fyrir að mynd líti rétt út, annað fyrir að allt sé rétt merkt, o.s.frv.). Þannig hef ég vísvitandi samið spurningar (hver spurning á við um eitthvað hugtak/atriði) þar sem 10 stig eru í pottinum, og hvert stig (stundum eru þau reyndar fleiri en eitt) á við um eitthvað ákveðið atriði. Ef það atriði er ekki leyst að fullu, þá legg ég mat á hversu slæm villan er og dreg frá stigabrot. Ég passa mig á því að skrifa niður hver frádrátturinn er á ‘stiga-lykilsblað’, svo að þegar ég rekst aftur á svipað þá eru einkunninar eins á milli nemenda.
Ég þyrfti að setjast niður við tækifæri og reyna að skrifa niður nákvæmlega hvað það er sem ég er að reyna að kenna fólki (“kunna formúlu fyrir AM mótun”, “kunna að nota formúlu fyrir AM mótun til að meta aflnýtni”, “vita hvaða útslagsmótun er með bestu aflnýtni”,…), en ég hef ekki gefið mér tíma til þess ennþá. Gróflega séð þá má finna það sem ég var að reyna að kenna í efnisyfirliti bókarinnar sem ég kenndi, en ég held að ég geti gert betur…