Miðvikudagur 28. mars 2007

Óvissur framtíðarinnar og annað vesen
Í tímaröð þá er ég nú að glíma við eftirfarandi vesen

• Almenn óvissa með vinnumál hjá Finni.
• “Candidacy“-ið mitt til að vera Ph.D. nemi er að renna út, því að nú eru liðin 5 ár frá því að ég byrjaði námið og ekki er ég útskrifuð enn. Það er hægt að fá því framlengt en það krefst pappírsvinnu.
• Við fáum að vita í júní hvort við höldum húsnæði á kampus eða ekki. Það lítur samt út fyrir að við þurfum að flytja eitthvert í sumar því þó svo að ég hafi getað hugsað mér að bæta við einu ungabarni í litla hreiðrið okkar, þá er nokkuð ljóst að það ekki pláss fyrir tvö. Sum sé, það fljóta yfir hausamótunum á mér flutningar. Annað hvort förum við í 3ja herbergja kampusíbúð, eða þurfum að leggjast í leiguleit. Hrollur.
• Vísamál, í meiningunni landvistarleyfi. Vísað mitt rennur út í lok ágúst og ég þarf að fá því framlengt. Það væri svo sem ekki neitt sérstaklega flókið mál nema hvað að ég þarf að breyta úr J-vísa í F-vísa (því við fengum undanþágu frá 2ja ára heimferðarreglunni) sem tekur tíma.
• Ég fæ hins vegar ekki landvistarleyfi nema ég sé skráð í skólann í haust sem þýðir að ég þarf að sækja um “undanþáguskráningu” samkvæmt nýrri mæðrastefnu skólans. Ég þarf að ræða við manninn sem sér um landvistarleyfin hvernig þetta fúnkerar best.
• Svo er þetta litla mál með að verja doktorsverkefnið. Ef ég á ekki að missa vitið verð ég einhvern veginn að verja í sumar. Hvort það gengur veit ég ekki, prófessorinn minn er fjarstaddur að endurnýja húsið sitt í Seattle og hinn leiðbeinandinn minn (sem finnst ég geta varið í vor) er upptekinn í grilljón verkefnum.
• Kaupa nýjan bíl, og almennt dót.
• Ganga með, eignast og hugsa um tvíbura. Það einhvern veginn virðist minnst áhyggjuvaldandi af þessu öllu saman, nema hvað að ég hlakka ekki til mjólkurmóðunnar og svefnleysisins.
• Undirbúa/íhuga/pæla í/standa í/framkvæma flutninga til Íslands. Á ekki að gerast síðar en vorið/sumarið 2008.