Framkvæmdagleði

2008-02-24Uncategorized Standard

Okkur varð mikið úr verki í dag þrátt fyrir rólegan morgun. Eftir einungis rúmlega þriggja ára bið, þá tók Finnur sig til og lengdi uppþvottavélaslöngurnar! Nú þurfum við ekki lengur að rúlla vélinni út á mitt eldhúsgólf til að tengja hana við kranann en á móti kemur að slöngurnar koma nú til með að liggja uppi á eldhúsborði daginn inn og daginn út sem er kannski ekki alveg það fallegasta í heimi. Reyndar keypti hann allt sem til þurfti síðasta sumar, nema eina slöngu sem var ekki til þá og því fór sem fór.

Ég veit reyndar ekki alveg af hverju ég sá ekki um að framlengja slöngurnar, heldur setti þetta á karlmannlegan verkalista Finns. Líklega vegna þess að ég hefði sett upp einhverja skítalausn einhverja helgina, því að ég er forfallin skítalausna-manneskja. Ég er svona verkfræðingur sem fær hlutina til að virka, en ekki endilega með flottustu eða skynsamlegustu lausninni nema með nokkrum ítrunar-atrennum. 🙂

Hvað um það… Síðan fórum við í Ikea og keyptum borð og litla hillu. Þau setti ég saman yfir Óskarnum í kvöld og var það hin fínasta iðjuþjálfun (“occupational therapy”). Það tók reyndar heilmikinn tíma að klambra saman borðinu, og mikið var ég fegin að við eigum borvél! 🙂 Borðið er komið í hornið hjá litla sófanum (þar sem hvíti stólinn var í gömlu íbúðinni) og fúnkerar sem framlenging á stofuborðinu sem hefur verið að drukkna í drasli undanfarin ár. Hillan er ekki alveg búin að finna sér stað ennþá en við finnum út úr því! 🙂