Íslendingar!
Þar með er helgin liðin, bara tæp klukkustund þar til mánudagurinn tekur formlega við. Það verður að segjast að helgin hefur aldrei þessu vant verið óvenju helguð Íslendingum. Á föstudaginn héldu Gunnar og Ásdís smá kveðjuhóf, en Gunnar var að klára nám sitt í rafmagnsverkfræðideildinni og þau hjónakornin eru á leiðinni heim til Íslands – með stuttu stoppi í Mexíkó. Þau verða þó ekki lengi heima því Ásdís var að fá inni í framhaldsnám í lögfræðiskólanum í Berkeley og það er því von á þeim aftur á svæðið í haust. Í kveðjuhófinu hitti ég þá Egil og Ólaf sem ég hef ekki hitt lengi.
Þar sem við erum með nóg pláss í bílskúrnum okkar, samþykktum við að geyma búslóð þeirra Gunnars og Ásdísar fram í ágúst, og laugardagurinn fór í að flytja dótið á milli. Reyndar lánuðum við þeim bara bílinn okkar svo þetta var heldur sársaukalaust að okkar hálfu – fyrir utan að ég þurfti að endurraða í bílskúrnum. Það tók hins vegar stutta stund og núna er aftur auðgengið inn í skúrinn.
Sunnudeginum eyddum við svo að mestu í að undirbúa komu Elsu og Þráins og barna. Þau bjuggu á kampus með okkur fyrstu árin, en fluttu svo heim til Íslands. Nú er Þráinn svo kominn í rannsóknarleyfi til Oregon, og þau ákváðu að skella sér suður eftir. Þau mættu klukkan fimm í dag eftir samtals 9 tíma keyrslu á tveimur dögum, geri aðrir betur! Við tókum á móti þeim með pönnukökum, og svo skelltum við Elsa okkur með krakkana út á leikvöll (jibbí fyrir lengri dögum!) á meðan Finnur og Þráinn redduðu kvöldmat. Það stendur til að flakka með þeim á þriðjudag og miðvikudag og þau fara síðan á fimmtudag.
Snemma beygist krókurinn – Bjarki með mús í hönd.
Anna kampakát í sundi á laugardeginum.
Fórnarlamb ljóskunnar Hrefnu. Ég steingleymdi að ein hellan
var heit eftir að ég hafði nýlokið við að steikja til pönnukökupönnuna
og skildi svo ekkert í því af hverju plastskálin (sem var full af hveiti
fyrir pönnukökur) var eins og límd við eldavélina…! Sem betur fer
náðist plastið af eldavélinni, en það mátti ekki miklu muna.
Kristborg les fyrir Önnu og Sigtrygg.
