Stroganoff í sinnepssósu

Fann þetta á netinu. Kom á óvart. Líklega ekki einskorðað við Stroganoff – örugglega hægt að gera þetta með gúllasbitum/stirfry kjöti líka.

700 gr. Stroganoff

salt og pipar

3 msk smjör

2 msk hveiti

2 bollar nautakraftur (2 bollar sjóðandi vatn + 2 kjötteningar)

2 msk Dijon sinnep

1/4 bolli sýrður rjómi

1 msk ólívuolía

1/2 laukur, niðursneiddur

1/3 bolli asíur (má sleppa)

450 gr. eggjanúðlur

Söxuð steinselja (til skreytingar)

Stroganoffið skorið í bita. Smjör og ólívuolía brædd á pönnu, kjötið sett á pönnuna og steikt ásamt söxuðum lauk og saltað og piprað eftir smekk (ég setti hvítlauk líka – má sleppa). Ef asíur eru notaðar (sem ég notaði ekki) eru þær settar í eftir að kjötið hefur steikst í 3-4 mín. Eftir steikingu er kjötið tekið frá og haldið heitu.

Eggjanúðlurnar settar í sjóðandi vatn og soðið eftir leiðbeiningum á pakkanum.

Smjör brætt á pönnunni, hveiti hellt varlega út og hrært vel. Sama með kjötkraftinn. Soðið í 1 mínútu og svo sinnepið og rjóminn sett út í. Soðið í 2-3 mínútur. Eftir þetta er þetta bragðbætt eftir smekk með því sem er til í kryddskápnum. Mér fannst vanta smá fyllingu (fer kannski eftir kjötkraftinum sem notaður er) og bætti við cayenne pipar, laukduft og papriku.

Stolið og staðfært héðan.