Í suðursveitum

Þessi forláta In-n-Out hamborgarastaður býr á vegamótum
millifylkjavegar fimm og vegspotta númer fjörtíu-og-eitt.
Ég er ekki frá því að við höfum stoppað þarna á öllum okkar
ferðum á milli nyrðri og syðri fylkishluta. Ég hélt að þetta
væri eina In-n-Out búllan á leiðinni, en núna tók ég eftir
einni nýrri rétt norðan við fjöllin sem skilja að miðdalinn
(þar sem við eyddum 3 klst á keyrslu) og borg englanna.

Þegar til borg englann var komið fórum við ekki beint heim til Gunnhildar og Jóns, heldur í mjög svo módern hús sem þau eru með aðgang að á meðan góðvinahjón þeirra eru á Íslandi yfir jólin. Þar gistum við því hitakerfið í húsi Gunnhildar og Jóns var í lamasessi.

Anna og Bjarki að fikra sig niður stigann í
fína húsinu. Húsið er allt í módern stíl,
sem myndast vel, en er kannski ekki það
al-praktískasta, sérstaklega með börn.

Helena og Finnur við stóra borðið, á meðan Bjarki leikur
með ryksuguna.

Við fundum fyrir því fyrsta kvöldið að þó að það væri gaman að vera í svona “hönnuðu” húsi með hitunarkerfi í góðu lagi þá hafði markmið ferðarinnar verið að eyða tíma með Gunnhildi og Jóni, sem var erfitt að gera á meðan við vorum í sitt hvoru húsinu í sínu hvoru bæjarfélaginu. Við ákváðum því að bíta á jaxlinn og flytja okkur yfir í þeirra hús daginn eftir þrátt fyrir næturkuldann.

Komin í húsið þeirra Jóns og Gunnhildar. Bjarki var gríðarlega
spenntur fyrir hundinum Lucy, á meðan Anna tók sér góðan tíma
í að vinna upp hugrekki til að umgangast hana.

Við fluttum sem sagt okkar hafurtask á milli hús á sunnudeginum, og eyddum rólegu eftirmiðdegi með þeim hjónakornum, svo og Helenu dóttur þeirra, Ármanni syni Jóns og bróðurdóttur Jóns og dóttur hennar. Það er sko alltaf nóg af fólki í kringum Gunnhildi og Jón! Því verður ekki neitað að húsið var ískalt í nótt, en það slapp fyrir horn með náttfötum og mörgum sængurlögum.

Í dag, mánudag, gerðist það helst markvert að við fórum á bókasafnið og fengum lánaðar 28 barnabækur, og fórum svo í örlítið búðarráp. Jú, og svo tókst vini þeirra hjóna loksins að laga hitunarkerfið, svo nú líður öllum betur og von á talsvert hlýrri nótt en í gærnótt.

Það er mest lítið planað fyrir næstu daga annað en bara slappa af, fara með krakkana á leikvelli og tsjilla. Það heillar lítið að standa í biðröðum með öllum hinum foreldrunum í einhverjum “skemmtigarði”, og þar sem að við eigum eftir að þurfa að keyra til baka, þá er ólíklegt að við leggjum í langan akstur til að skoða eitt eða neitt.