Fyrsta vikan

[We’ve returned back to the USA, so this marks the end of the English updates. Sorry all (three of you)! Of course, if there’s lots of protests I might institute a weekly English Update, but only if I get (more than 10?) requests. Requests can be left in the “Leggja orð í belg” link, here on the top right of this entry.]

Hæhó, kominn tími á íslensku aftur. Þetta er nú búin að vera meiri vikan, og hún er ekki einu sinni búin ennþá! Það er bara föstudagsmorgun, og ég á að vera að vinna, en er þreytt og hálf-heiladauð svo ég ætla að blogg fyrst, og sjá svo hvað setur. Kannski kikkar mokkað inn bráðum og ég breytist í vinnuhæft ástand.

Hvað um það. Já vikan. Þetta hefur verið með lengri vikum sem ég hef upplifað, og það eina sem bjargar henni er vitneskjan að í næstu viku fer Bjarki úr hálfsdags plássi yfir í heilsdagspláss á leikskólanum, og þá verð ég bara ábyrg fyrir Önnu eftir hádegi, en ekki þeim báðum.

Það er helst tvennt sem hefur gert vikuna sársaukafulla og það eru a) læknisheimsóknir og b) þrjóskan í mér sem neitar að stilla Önnu upp fyrir framan sjónvarpið á meðan Bjarki á að sofa eftir hádegi. Ég vissi það fyrirfram að það yrðu margar læknisheimsóknir, en þegar þær voru pantaðar þá gerði ég ráð fyrir að Anna væri að fara í eftiskólapössun (sem svo datt upp fyrir). Þrjóskan hins vegar er bara mér að kenna, og ég held að ég láti af henni í dag, svona í tilefni af því að það er föstudagur.

En já, læknisheimsóknir. Á mánudaginn fór ég með (ofvirkan) Bjarka í heimsókn til meltingarsérfræðings og reyndi mitt besta til að ná upp úr honum öllum þeim upplýsingum sem ég þurfti á meðan Bjarki reyndi sitt besta til að sleppa út úr herberginu, og varð heldur betur fúll þegar ég settist fyrir hurðina. Sem betur fer var Anna í pössun á meðan, annars hefði þetta verið ennþá skrautlegra. Niðurstaðan úr þeirri heimsókn er að Bjarki heldur áfram á brjóstsviðalyfinu, og að flestir krakkar vaxa upp úr vélindabakflæði 2-3 ára. Við sjáum hvað setur næsta vor.

Á þriðjudeginum byrjaði Anna loksins í kindergarten, og fyrsti skóladagurinn var “allt í lagi”. Hún mætir í skólann kl. 08:25 og er búin 11:45. Við getum reyndar sent hana í skólann með hádegismat í nesti og þá getum við náð í hana kl. 12:10. Anna greyið er búin að vera heldur spennt fyrir þessu, og taugatitringurinn olli því að hún var gríðarlega þver og leiðinleg og uppstökk allan þriðjudaginn.

Á miðvikudaginn var skóladagur númer tvö og aftur “allt í lagi”. Anna var heldur rólegri þann eftirmiðdaginn sem var mikill léttir. Hins vegar bættist við óvænt læknisheimsókn, því Bjarki var óhamingjusamur á leikskólanum, grípandi í eyrun og á-andi. Í ljós kom að hann er aftur kominn með eyrnabólgu, þá fyrstu síðan í mars. Mig grunar að það þýði að hann fái fljótlega rör, svo við verðum ekki syndandi í pensillíni í allan vetur.

Í gær fimmtudag, þá fór ég með Bjarka til enn eins læknisins, í þetta sinn augnlæknis. Þar uppgötvaði ég að blessaður síminn okkar getur spilað myndbönd af YouTube og við skemmtum okkur ágætlega yfir laginu hans Elmos. Þar sem að Bjarki er með kvef (síðan á sunnudaginn) þá vorum við beðin að bíða frammi á gangi (takk svínaflensa).

Það var fínt framan af, en eftir að hann var búinn að fá augndropana (sem víkka sjáöldrin) þá varð hann heldur fúll, svo ég hleypti honum úr kerrunni (sem ég mun ekki gleyma framvegis eftir reynslu mánudagsins). Þegar hann hins vegar fékk ekki að leika sér í lyftunni, þá missti hann sig alveg og sat eftir það öskrandi í kerrunni þar til læknirinn kallaði okkur inn.

Niðurstaðan úr augnskoðunninni er sú að Bjarki er nú hvorki nærsýnn né fjarsýnn, en hins vegar með smávægilega sjónskekkju, sem ekki þarf að leiðrétta fyrir. Hins vegar er hægra augað heldur latt, og því eigum við loka fyrir vinstra augað með plástri í tvo tíma daglega, í 3 mánuði. Ég prófaði að gera það eftir lúrinn hans og það gekk, uh, hræðilega. Við reynum aftur seinna í dag.

Um kvöldið fór ég svo á fund í skólanum hennar Önnu, sem reyndist algjör upplýsinga-flóðskriða. Skólinn sá er “sérskóli” innan almenna skólakerfisins, sem byggist að miklu leyti upp á að foreldrar taki þátt í starfinu. Foreldrar eiga að hjálpa til í 2 tíma í hverri viku í bekknum, þeir þurfa að taka að sér verkefni fyrir bekkinn (ég er að vonast eftir að fá að vera hirð-ljósmyndari), svo þarf að sitja í einhverri af þúsund nefndum (garðnefnd, fjáröflunarnefnd, lista-námskeiðsnefnd…), svo og standa skilum á 20 tíma vinnuskyldu fyrir skólann sjálfan (getur verið barnapössun, viðgerðir…).

Og já, þá erum við komin að föstudegi. Í dag er læknisheimsókn númer 4, það er 2ja ára skoðun á Bjarka hjá barnalækninum. Það verður fróðlegt að sjá hvað hann fær margar sprautur, og hvað hún segir með eyrun. Fjör og gaman! 🙂

En sum sé, í næstu viku þá fer Bjarki að vera lengur í leikskólanum, og þá fáum við Anna meira ferðafrelsi. Svo þarf ég að finna út úr því hvernig ég get laumað mér í heimsóknir hjá hinum ýmsu aðilum, því ég hef fundið alveg gríðarlega fyrir því hvað ég þarf innilega á því að halda að bara tala við annað fullorðið fólk, sem eru ekki læknar eða hjúkrunarfræðingar. En við finnum út úr því með tíð og tíma. Það eru örugglega betri tímar framundan! 🙂