Krakkadagar

Í síðustu viku var “Week of the Young Child“. Af því tilefni var m.a. haldin pottlukka á þriðjudeginum, hópsöngur/söngskemmtun á miðvikudeginum og “taktu barnið með í vinnuna”-skemmtun á fimmtudeginum. Á föstudeginum var svo starfsdagur kennara svo að foreldrar og börn fengu að eyða deginum saman.

Hér eru myndir sem Finnur tók í “taktu barnið með í vinnuna”-skemtuninni:

Anna hjá sápukúlumanninum.

Anna býr til sína eigin risa-sápukúlu.

Krakkarnir fengu sérstakan bol með Gúgul-merki
í anda “Litlu svöngu lirfunnar”.

Hápunktur dagsins voru víst hoppukastalarnir.

Finnur þurfti að vinna á föstudeginum svo að ég “fórnaði” mér og var ein með krakkana allan daginn, sem er orðið mun auðveldara en bara fyrir nokkrum mánuðum. Við byrjuðum á því að fara með Bjarka til lungnalæknisins. Hann fór síðast til hans fyrir rúmu hálfu ári, og lækninum leist bara vel á hann. Sérstaklega var hann kátur með vaxtarkúrvurnar, því að Bjarki er núna á 10-25% línunni fyrir þyngd og 50% fyrir hæð miðað við “réttan aldur”, en ekki “leiðréttan aldur”. Það er víst svo að þegar eitthvað er “að”, þá hætta börn að vaxa og þetta er því gott merki. Læknirinn vill skoða hann aftur eftir ár, nema eitthvað komi upp á.

Að læknisheimsókn lokinni fórum við í borð-leiðangur. Við erum farin að finna fyrir því að eldhúsborðið rúmar bara 6 manns, það er tvo gesti, svo það er kominn tími á að stækka við okkur. Leiðin lá í Pottery Barn, Williams-Sonoma og svo Ikea. Ekki fann ég neitt sem heillaði mig sérstaklega, enda ljós borð greinilega ekki móðins í dag. Konan í W-S stakk því upp á að við myndum leita uppi fyrirtæki sem selja ólökkuð húsgögn og ég setti það bak við eyrað. Restin af föstudeginum leið ljúflega því við sofnuðum öll eftir hádegi og svo var gert stutt stopp á leikvelli áður en við náðum í Finn.

Á laugardeginum (í gær) gerðist það helst markvert að Anna tók sér síðdegisblund annan daginn í röð og að ég fór á kosningavöku til Margrétar seinni partinn, á meðan Finnur sá um krakkana. Við kímdum yfir íslenskum krúttlegheitum, eins og því að lesnar voru aðsendar vísur og stökur í beinni, og þegar ein fréttakonan lagðist upp á greyið pylsusölumanninn í Bæjarins bestu á meðan hann var að reyna að gefa til baka! Svo var skemmtilegt að sjá fréttamenn ramba inn í hin og þessi hús og tala við fólk í misgóðu ástandi.

Það kom mér á óvart hversu litlar breytingar urðu í raun á flokkaskiptingu á þingi, en ég er kát með að hlutur kvenna hefur aukist talsvert. Það vakti líka athygli mína að í sumum þingdæmum var fylgi fjórflokkanna jafnt. Þýðir það að enginn hafi rétt fyrir sér? Eða sterka skoðun á málinu? Hvaða merkingu hefur það ef niðurstaðan er á við að kastað sé 4ra hliða (ok, 4.5 hliða, miðað við 4×22% fylgi) teningi? Þegar heim var komið héldum við Finnur áfram að horfa á ruv.is þar til þeir sjálfir gáfust upp og fóru að sýna barnaefni klukkan 01:11 að okkar tíma, eða 08:11 heima á Íslandi.

Í dag, sunnudag, tókum við okkur Anna til og plöntuðum tveimur blómum sem við keyptum í síðustu viku. Blómin atarna munu vonandi lífga upp á blómareitinn fyrir framan hjá okkur, sem er sem stendur frekar litadaufur og hefði haft gott af áburði fyrr í vor. Á meðan Anna lék sér hjá nágranna-vinkonu sinni þá náði ég svo að reita meiripartinn af arfanum í beðinu, sem var hin ágætasta “occupational therapy”.

Eftir hádegi skutluðum við Önnu í afmæli til Lulu vinkonu sinnar og héldum svo á borða-veiðar. Ég byrjaði á því að draga Finn í Crate & Barrel til að gefa honum smá “sticker-shock” og setja borðamál í samhengi. Svo lá leiðin í vöruhús með lítt-áhugaverðum húsgögnum áður en við heimsóttum “Hoot Judkins” sem Torie benti okkur á. Sú búð selur ólökkuð húsgögn, og þar er líka hægt að velja saman borðplötur og fætur. Við sáum ekkert sem heillaði mikið, en brugðum okkur samt á tal við einn sölumanninn.

Sá sýndi okkur bækling og þar fundum við borð sem uppfyllti okkar skilyrði. Eini gallinn var að eina svoleiðis borðið var í búð uppi í San Bruno, sem er við flugvöllinn (20 mín fjarlægð). Leiðin lá því þangað og við gengum út með kvittun fyrir borðplötu, fótum og átta stólum! Allt er þetta ólakkað, og með ágætis afslætti. Við fáum borðið og tvo stóla um miðjan maí, og svo er von á restinni í júní. Nú er bara að ákveða hvort við ætlum að olíubera, vaxbera eða lakka… 🙂