Verslað í rigningu
Í dag spiluðum við Finnur “one-on-one” vörn, ef frá er skilin blá-byrjunin og blá-endirinn á deginum. Þeir feðgar eyddu deginum heima, á meðan ég og Anna þvældumst um í grenjandi rigningunni og styrktum efnahaginn. Við byrjuðum reyndar á því að fara í sund, og svömluðum lengi vel um í klór/salt-gufunum í þykistu-innilauginni.
Kennslulaugin er falin undir þessu plast-skrýmsli!
Eftir sundið fengum við okkur hádegismat á Crepes Cafe, og mig grunar að Anna eigi eftir að stinga upp á fleiri eftir-sunds-hádegisverðum þar. Sport að fá pönnukökur í hádegismat, ó-já! 🙂
Á framtíðarplaninu er að fara með Sólveigu og Arnari á skíði í byrjun mars. Fjölskyldan er að sjálfsögðu gjörsamlega vanbúin í svoleiðis ævintýri, og lítið um vini og ættingja til að betla græjur frá. Ég hef því verið að sanka að mér hinu og þessu á útsölum, því það er blóðugt að borga mikinn pening fyrir föt sem krakkarnir eiga eftir að nota örsjaldan, og svo vaxa upp úr. Nú er einmitt allur skíðaútbúnaður á útsölu, enda vor- og sumarvörurnar komnar í búðir – sem er gjörsamlega út í hött í febrúar, en hvað um það.
Fyrsta búðarstopp var því í REI, þar sem að bæði ég og Anna fundum okkur skó – á útsölu að sjálfsögðu. Hennar eru reyndar 2 númerum of stórir, en hún vildi samt ekki meina að þeir væru neitt óþarflega rúmgóðir, sérstaklega í þykkum sokkum. Ég er amk að vona að hún geti notað þá líka næsta vetur. Svo fundum við líka góða snjóþotu með góðu baki.
Næst lá leiðin í Jo-Ann þar sem ég keypti loksins loksins loksins földunarlímband, til að falda síðustu gardínuna í herberginu okkar. Límbandið sem fylgdi frá Ikea hvarf á óskiljanlegan hátt (lesist: Anna) og það hefur gengið treglega að muna eftir að kaupa nýtt. En nú hef ég enga afsökun lengur!
Að því loknu gerði ég heiðarlega tilraun til að skipta fötum sem Bjarki fékk í rosalega síðbúna afmælisgjöf í Babies’R’Us, en þá kom í ljós að gjafakvittunin sem fylgdi pakkanum virtist ekki eiga við fötin í pakkanum, og þess fyrir utan kannaðist sölufólkið ekki við að hafa selt nákvæmlega svona föt. Við fórum því út aftur (pínkulítið pirr) og í næstu búð við hliðina á, Toys’R’Us, og keyptum nokkra kubba í kubbasafnið. Bjarki er nefnilega orðinn lunkinn við að setja saman þessa átta MegaBloks kubba sem við eigum…
En þar með var ekki allt búið. Þökk sé gSímanum góða fann ég leiðbeiningar á enn eina útivistarbúðina, Redwood Trading Post. Þar fundum við snjóskó á Bjarka, en allir krakkasnjóskórnir voru uppseldir í REI. Ég hélt einnig áfram leitinni að snjóbuxum fyrir mig í ofur-stærð, en ég held að það sé ekki gert ráð fyrir að konur í ofur-stærð fari út úr húsi. Sem er kannski rétt, en pirrandi engu að síður.
Eftir þessa maraþon-verslunarferð enduðum við svo í Heilu búðinni og keyptum örlítið í matinn. Á leiðinni heim stoppuðum við hjá bláa-leikvellinum í nágrenninu, sem er við Stevens Creek affallsskurðinn. Þar gengum við út á bláu brúna (sem sést á efstu myndinni) og það stóð heima, lækjarsprænan var orðin að heljarinnar vatnsflaumi, enda búið að hellirigna í allan dag. Komum svo heim og Finnur eldaði skeljar og hörpudisk í kvöldmat.
Eftir daginn þá er Anna orðin vel sett varðandi framtíðarskíðaferð. Ég er hins vegar ekki alveg búin að sjá hvað er best að gera við Bjarka. Fatalega séð þá eigum við risastóra 2T skíðaúlpu af Önnu, og 3T buxur. Þar sem sá galli er hins vegar svo risastór, þá var ég farin að sjá fyrir mér að setja hann bara í 2-3 flíslög, og svo pollagalla (sem passar) yfir.
Skórmál eru verri. Bjarki er ennþá með skófælni á hæsta stigi, alveg eins og stóra systir á sínum tíma. Hann fékk hreinlega taugaáfall þegar ég setti hann í snjóskóna áðan, og það sama hefur átt við um sandalana sem ég keypti í janúar. Ég er því ekki viss hvernig ég á að halda hita á táslunum hans. Helst var mér farið að detta í hug að setja hann í mörg sokkalög og svo plastpoka yfir. Eða að nota 3T snjóbuxurnar af Önnu, og setja teygju eða eitthvað neðst á þær til að loka fyrir!?!! Er einhver með góða hugmynd um hvað á að gera við ca. 17 mánaða gutta sem er ekki farinn að ganga og hatar skó?
Við erum hins vegar farin að hugsa okkur gott til skíðaglóðarinnar (amk snjóglóðarinnar) því að rigningarnar hjá okkur þýða heilmikla snjókomu uppi í fjöllum. Það hefur víst verið heldur snjóléttur vetur hingað til, en vonandi þýðir þessi hretasyrpa sem við eigum von næstu vikuna að það verði nóg af köldu hvítu efni ti að leika sér í.