Þroskamat

Í dag mættu hingað tvær konur til að fara yfir stöðumat á þroska Bjarka og ræða framhaldið. Önnur konan er þroska-sérfræðingur, hefur heimsótt okkur á mánaðarfresti í næstum ár, og framkvæmdi stöðumatið. Hin konan er “case worker”/umsjónarkona(?), og hún sér um að hann fái alla þá þjónustu sem hann þarf á að halda. Báðar eru þær indælar, og ég hef ekkert út á þær að setja nema að umsjónarkonan talar frekar slæma ensku.

Niðurstaða stöðumatsins er að þroski Bjarka er innan eðlilegra marka. Á sumum sviðum er hann örlítið eftir á, en á öðrum er hann örlítið á undan meðaltalinu. Matið var gert þegar hann var 14.5 mánaða (leiðrétt, 18 mánaða í alvörunni). Það fór þannig fram að ég var spurð spjörunum út úr um hvað Bjarki kann og gerir (mikið af “Uhhhh?… Það veit ég ekki, á maður að taka eftir svoleiðis?” svörum) , á milli þess að hún lagði þrautir fyrir Bjarka sjálfan.

Hann mælist sum sé 11 mánaða í “gross motor”/stórum hreyfingum, en 16 mánaða í “fine motor”/fínum hreyfingum. Það stemmir við það sem við höfum séð, því hann hefur alltaf eytt miklum tíma í skoða heiminn með puttunum og er því fingralipur, en minna verið í löngum ferðalögum þar sem sniðugt væri að geta gengið. Þannig fór hann ekki að skríða fyrr en hann var gjörsamlega búinn að grandskoða allt í sínu næsta nágrenni – sem tók tímana tvenna og þrenna! 🙂

Næst mælist hann 13 mánaða í “self-care”/sjálfsumönnun – það er að drekka úr bolla, tyggja mat, hjálpa til við að klæða sig, biðja um mat/drykk og vita hvað er ætt og hvað er óætt. Hann mælist sem 19 mánaða í “attention og memory”/athygli og minni, enda dundar hann sér við að lesa bók í lengri tíma og leitar að földum leikföngum. Enginn athyglisbrestur þar á ferð. Hins vegar mælist hann sem 11 mánaða í “perception and concepts”/skynjun og hugtök. Þar er átt við hvernig hann skynjar og skoðar heiminn í kringum sig, hvort hann hermir eftir andlitshreyfingum o.s.frv.

Þegar kemur að samskiptum mælist hann sem 11 mánaða þegar kemur að því að skilja það sem aðrir segja og hlýða því (“receptive communication”). Helst hefur verið erfitt að fá hann til að benda á hluti eftir skipun, sem dregur hann niður. Hins vegar mælist hann 14 mánaða þegar kemur að því að tjá sig (“expressive communication”), enda blaðrar hann út í eitt meiripart dags, kann örfá orð (ma-ma, ba-ba, bæ-bæ, na-na (Anna), abbe (apple)) og hefur sterkar skoðanir á því sem hann vill.

Hann mælist 13 mánaða í “adult interaction”/samskipti við fullorðna. Þannig gerir hann greinarmun á fólki sem hann þekkir og þekkir ekki, er kátur að fá athygli og þar fram eftir götunum. Að lokum mælist hann svo 18 mánaða í “self-concept and social role”/sjálfsvitun og félagshegðun. Hann er sjálfstæður, verður reiður þegar dót er tekið af honum, hermir eftir öðrum, er áhugasamur um leik og þar fram eftir götunum.

Þar sem Bjarki mælist innan “eðlilegra marka” (minna en 25% eftir á í aldri, það er meira en 10 mánaða) þá þarf hann ekki á neinni þerapíu að halda sem stendur. Umsjónarkonan minntist samt á að ef hann dregst mikið aftur úr með tal, þá myndi hún ávísa á hann talþjálfara einu sinni í viku í sumar. Við sjáum samt hvað setur með það, því það er ekki nóg með að hann sé fyrirburi, heldur er hann líka karlkyns og tvítyngdur svo að ég býst ekki við að hann verði altalandi á næstunni.

En sum sé, Bjarki er á nokkuð góðu róli, og vonandi heldur hann því áfram. Því verður samt ekki neitað að ég sé ennþá með áhyggjur í bakhluta heilans, því þótt maður lesi um fyrirbura sem vegnar vel í lífinu, þá eru mörg langtíma-vandamál oft til staðar, jafnvel þótt 2ja ára skoðun hafi komið vel út. Svo við höldum áfram að bíða til að sjá hvað verður.

Talandi um sjón… Ég hef haft hægra augað hans Bjarka grunað um leti (“strabismus”) undanfarna mánuði, því mér hefur sýnst að hann væri örlítið rangeygur. Í dag sá ég hins vegar greinilega að hægra augað rann inn í áttina að nefinu á meðan vinstra augað hélt sínu striki. Þegar ég minntist á þetta við kennarana hans sögðust þær hafa tekið eftir þessu síðan í nóvember, og héldu að þær hefðu minnst á það við mig. Uhh.. nei, ef frá er talið samtal sem ég átti við eina í maí þegar hann var miklu minni og hann fór í augnskoðun mánuði seinna. Þannig að ég pantaði tíma hjá barna-augnlækni þann 11. febrúar, og þá fær Bjarki væntanlega augnlepp.

Og svo í lokin, myndir! 🙂

Bjarki að borða klementínur í morgun.

Hann situr núna við borðið sjálft, enginn plastbakki lengur takk!

Mynd eftir Önnu, smellið á myndina til að fá stærri útgáfu.