Samtíningur

Snorra-“flæ-bæ”
Hann Snorri hennar Guðrúnar og fyrrverandi Kaliforníubúi kom í stutta heimsókn til okkar á föstudeginum. Hann hafði eytt vikunni í Los Angeles á Siggraph ráðstefnunni og notaði tækifærið til að heilsa upp á gamla vini á bakaleiðinni. Á laugardeginum fór hann með Finni og Önnu í stuttan verslunartúr (en ekki hvað?) og síðan eyddum við síðdeginu úti í bakgarði með margarítur í hönd (en ekki hvað?).

Um kvöldið fór hann út að borða með gömlum vinum (ó, greyið við!) en í staðinn kom Sarah í heimsókn, enda steggjapartý heima hjá henni. Við kynntum hana fyrir handbolta og horfðum á Ísland-Danmörk, sem var æsispennandi. Það skal tekið fram að Bandaríkjamenn vita ekkert um “okkar” handbolta, því að “handbolti” hér þýðir veggjatennis án spaða. Söruh leist vel á leikinn og getur núna farið að boða fagnaðarerindið! 🙂

Snorri lagði síðan í langferð heim til Íslands á sunnudagsmorgni og nú erum við bara að vona að hann geti sannfært sína yfirmenn um að senda hann á fleiri ráðstefnur í nágrenninu!! 🙂

Smekk-maurar
Í síðustu viku tók ég eftir maurum uppi á einni borðplötunni í eldhúsinu. Þá hafði einn lyktsterkur rifinn oststrimill orðið eftir bak við seríóskassa og það var nóg til að maurarnir voru búnir að mynda tvíbreiðan veg að og frá honum og bak við eina dósina á veggnum. Ég drekkti maurunum í spritti og þreif borðplötuna og þóttist þar með laus við þá.

Í gær, mánudag, var ég hins vegar að búa til gúllas-súpu í hendingskasti og skar kjötið á öðru bretti en grænmetið, eins og lög og reglur segja til um. Til að fá meira vinnupláss lét ég óþvegið brettið með kjötleyfum bak við mig á borðið nálægt vaskinum (og fyrrnefndri veggdós) og hélt áfram með mitt við eldavélina.

Um 10-15 mínútum síðar var ég búin að sulla öllu saman á eldavélinni og snéri mér við til að taka til hjá vaskinum. Sé ég þá hvar það er búið að stofna til fimmfaldrar maura-hraðbrautar í tvær áttir frá dósinni góðu og yfir á kjötbrettið! Ég verð að viðurkenna að ég var hálf stolt af maurunum að vera svona sniðugir að bíða eftir stórkostlegu prótín-tækifæri og láta svo til skarar skríða! En sem fyrr drekkti ég þeim í spritti og fjarlægði brettið og þar með var sú innrás búin.

Finnur tók sig síðan til og skrúfaði dósina af og reyndi að fylla upp í þau göt sem hann sá. Nú er síðan spurning hvort við reynum eitthvað drastískara eins og að kaupa ammóníak maurafæðu í þeirri von að gera út af við drottninguna. Nú er maður orðinn svo heilaþveginn af Disney og öllum mauramyndunum að maður kennir hálft í hvoru í brjósti um greyin svo að það er ekki alveg komin niðurstaða í það mál. Við sjáum hvað setur.

Hr. Bjarki
Herra Bjarki er allur að koma til eftir veikindi síðustu viku. Reyndar greindist hann með þrusk (thrush) á sunnudaginn sem er tilkominn því að pensillínið er búið að leggja hans venjulega sveppa-varnarkerfi í rúst. Í dag er hann því að fá sýrustillandi lyf fyrir magann, pensillín og sveppalyf í munninn. Síðasta framtönnin var svo á leiðinni niður alla veikindavikuna og ég held að hún sé loksins búin að bora sig út í gegnum holdið núna. Gaman, gaman!

Þess fyrir utan þá er hann núna farinn að fara alla leið upp í standandi stöðu. Hann er búinn að vera að vinna í því að vera uppréttur á hnjánum, en núna getur hann farið alla leiðina upp – svona stundum. Helst hefur hann verið að standa upp við sófann og leikborðið sitt. Um daginn fór hann upp fimm tröppur og það fer því að líða að því að við þurfum að draga fram stigahliðin. Ekki gaman það.

Löng helgi framundan
Á morgun, miðvikudag hefjast starfsdagar leikskólans og standa út vikuna. Finnur er því búinn að taka sér frí og planið er að fara í dagsferðir með krakkana svo að við myglum ekki endanlega inni í húsi. Inn á milli ætlum við að reyna að setja upp “pleideit” líka.

Annars datt okkur í hug að keyra loksins niður til LA og heimsækja frænku mína og fjölskyldu, en þá hitti svo illa á að þau verða lítið heima við næstu daga! Það er kannski bara eins gott því að það hefði tekið þó nokkuð á að keyra suðureftir og aftur til baka. Við hefðum líklega gert þetta að kvöld-ferð til að krakkarnir gætu bara sofið, en það hefði þýtt að við hefðum ekki náð á leiðarenda fyrr en eftir miðnætti. Hvað um það, ætli við reynum bara ekki að bóka ódýrt flug síðar í haust.