Meiri bakstur

Til að koma okkur og Söruh og Augusto í jólaskap var haldinn piparköku-gerðar-dagur í dag. Í þetta sinn var ég tilbúin og var búin að búa til deig kvöldið áður svo það var vel kalt. Þegar á hólminn var komið bjó ég líka til smákökudeig úr Kökublaði Vikunnar sem mamma var svo sniðug að láta fljóta með í jólakassanum. Takk fyrir það mamma!! 🙂

Ég skar reyndar persónulega ekki út eina einustu piparköku (fyrir utan tvo glugga á öðru piparkökuhúsinu) en bjó hins vegar til fullt af smákökum. Þess á milli hugaði ég að Bjarka sem var ekki alveg að gúttera jólatónlistina og lætin í okkur – og þurfti þess fyrir utan að ropa/prumpa/kúka/dotta/drekka að vanda. Sarah og Augusto voru aðal-piparköku-hetjurnar og hönnuðu og skáru út tvö hús og bjuggu til smákökur og aðrar piparkökur! Finnur þeyttist svo á milli smákaknanna, Önnu (sem brenndi sig örlítið á einni plötunni) og Bjarka.

Klukkan fimm fórum við Anna svo í afmæli til bekkjarsystur hennar í My Gym, þar sem Anna fékk að hlaupa úr sér allan sykurinn úr smákökunum. Þegar við komum heim aftur tæpum tveimur tímum seinna beið okkar nautakjöt af grillinu – mmmmm!

Eftir að Anna var farin í rúmið réðumst við Augusto í það að líma saman húsin með bráðnuðum sykri, minnug ráðlegginga mömmu um að koma alls ekki við hann! Það skotgekk svo við freistuðumst til að skreyta húsin þó svo að ég hafi nú ætlað að bíða með það þar til Anna vaknaði á morgun. En hún getur auðveldlega bætt við skreytinguna auk þess sem við skreyttum engar piparkökur.

Anna nýkomin úr klippingu þar sem hún fékk þessar fínu fléttur!

Ég fór líka í klippingu og er núna með hár niður á axlir, enda í miðju hárlos-eftir-óléttu-kasti og því lítið vit
í að reyna að viðhalda síðu hári sem stendur. Psoriasið er líka á útopnu í andlitinu eftir allt stressið
sem virðist seint ætla að seitla í burtu.

Klassískt piparkökuhús sem ég pantaði.

Hugarfóstur Augusto!

Ég læt fylgja með uppskriftir dagsins svo ég geti fundið hvað við gerðum á næsta ári!

Piparkökur fyrir húsbyggingu
(Þessi uppskrift heitir “Piparkökur 2“)

200 g sykur
200 g síróp
6 msk. vatn
500 g hveiti
1 tsk. kanill
1 tsk. negull
1 tsk. engifer
2 tsk. matarsóti
100 g smjörlíki

Hafið smjörið við stofuhita ásamt öðru hráefni, setjið í hrærivélarskálina og vinnið rólega saman. Þegar deigið er vel blandað skal stöðva vélina strax, annars verður deigið klesst. Setjið deigið í plastpoka og geymið í kæli helst yfir nótt. Rúllið út deigið og setjið ávallt hveiti undir. Stingið út að eigin geðþótta. Þetta deig er mjög gott í piparkökuhús, stór hjörtu og alls konar stóra hluti til að geyma. Bakið deigið við 180-190°. Smákökur bakast í ca. 10 mín., og stærri hlutir bakast lengur.

Hafið vel af hveiti undir svo ekki festist við borðið þegar rúllað er út. Stingið eða skerið út eftir ykkar hentisemi og raðið á plötu.

Piparkökur til útskurðar
(Þessi uppskrift heitir “Piparkökur 3“. Hún reyndist vera frekar vonlaus, því hún var allt of blaut og það þurfti að bæta heilmiklu hveiti til að geta unnið með deigið – sem á móti deyfði bragðið. Muna að nota ekki aftur!)

270 g hveiti
150 g sykur
150 g smjörlíki
150 g síróp
½ tsk. kanill
½ tsk. negull
1/4 tsk. engifer
1/4 tsk. lyftiduft
1 tsk. vatn
hn.odd salt
1 stk. egg

Hafið öll hráefni við sama hitastig, setjið þau í hrærivélarskálina og vinnið rólega saman. Setjið í plastpoka og geymið í kæli yfir nótt. Rúllið út og skerið út eftir einhverjum fínum mótum. Bakið við 180° í ca. 10 mín., en það fer mikið eftir hversu þykkt er rúllað. Þetta deig er ekki gott fyrir piparkökuhús þar sem það er svolítið laust í sér og hefur því litla burði, en bragðast mjög vel.

Súkkulaðibitakökur mömmu
frá Ernu Valsdóttur, birt í Kökublaði Vikunnar 29. nóvember 2007. Þetta reyndust snilldarkökur (mér finnst kókós æði) og það er erfitt að hætta að borða þær þegar maður er einu sinni byrjaður – sérstaklega ef þær eru volgar!

250 g smjörlíki (ég notaði smjör því það er fullt af “trans-fitum” í smjörlíki)
320 g sykur
200 g dökkur púðursykur (okkar var reyndar frekar ljós)
3 egg
540 g hveiti
1.5 tsk matarsódi
1 tsk salt
120 g gróft kókósmjöl (átti bara ca 70 g en það dugði)
200 g Síríus suðusúkkulaði, saxað (notaði 100 g af dökkum og 100 g af hvítum Whole Foods míní-súkkulaði-bitum)

Framkvæmd (skv. uppskrift): Smjörlíkið hrært lint, sykurinn og púðursykurinn hrærður saman við. Eggjunum, hveitinu, saltinu og matarsódanum bætt í og hrært vel. Kókósmjölið sett út í og að lokum er súkkulaðið sett saman við. Búnar til kúlur og þeim þrýst niður með gaffli. Bakað við 200° C í 10 mín.

Framkvæmd (það sem gerðist í alvörunni): Hveitið, sykurinn, matarsódinn og saltið sigtað saman. Púðursykrinum (mjúkum) bætt úr í ásamt kókósmjölinu og öllu hrært lauslega saman. Ekki-ískalt-smjör mulið niður í skálina, og svo höndunum stungið í allt saman og smjörinu blandað við þurrefnin (mulið meira niður). Eggin sett út í og hrært með sleif til að byrja með og svo hnoðað með höndunum. Þegar þetta var orðið að klumpi var súkkulaðinu bætt út í og hnoðað enn meira til að dreifa því um degið. Búnar til litlar kúlur og þær flattar út með tveimur puttum. Bakaðar þar til orðnar ljósbrúnar.

Glassúr til skreytingar
(Þetta heitir líka “Royal Icing“)

250 g flórsykur
2 eggjahvítur

Bætið flórsykri í eggjahvítur. Hrærið í með sleif þar til úr verður þykkur glassúr. STÍFÞEYTIÐ síðan í hrærivél. Hægt að setja matarlitina í, nokkra dropa af t.d. rauðu, grænu o.s.frv.

Ég notaði aðeins 230 g af flórsykri, ekki vildi blandan stífþeytast og það var alveg á mörkunum að glassúrinn harðnaði á piparkökunum – en hann gerði það samt fyrir rest. Sá eftir leit á netinu að því meiri sykur, því stífari glassúr. Fann t.d. 330 g flórsykur með 2 eggjahvítum. Svo er hægt að setja sítrónudropa eða vanilludropa í til að bragðbæta.