Þriðjudagur 13. mars 2007

Næstum búin
Eftir klukkustundar síðdegislúr reif ég mig á fætur og keyrði til Johnson Space Center. Þar plantaði ég mér í röð sem ég hélt að væri til að skoða risa-sundlaugina sem geimfararnir æfa sig í, en í staðinn lenti ég í röð til að skoða gömlu stjórnstöðina, sem var sett á eftirlaun árið 1996.

Það var áhugavert að sitja í VIP sætunum sem forsetar og stjörnur fengu að sitja í á dögum Apollo og Gemini ferðanna. Við sáum yfir klassísku stjórnborðin, hvert með sitt hlutverk. Þannig var borð fyrir gæjann sem átti að fylgjast með sjónvarpsstöðvunum, sem þá voru fjórar talsins, og taka eftir öllum geimferðafréttum.

Svo var að sjálfsögðu borð fyrir “flugstjórann” (flight director) og varnarmálaráðuneytið, og á því borði var stór rauður sími. Reyndar benti leiðsögumaðurinn á að öll borðin voru með símaskífu. Hann fékk þá sem höfðu notað skífusíma til að rétta upp hönd (það reyndust vera nokkrir) og svo bara þá sem voru yngri en tvítugt að rétta upp hönd. Það voru tveir…

Síðan keyrðum við að stóru eldflaugunum, og í þetta sinn var búið að opna húsið sem Saturn V eldflaugin er geymd í, en þær voru notaðar til að skjóta mönnum áleiðis til tunglsins. Þegar ég var þarna í fyrra þá var húsið lokað, og flaugin hulin plasti. En nú er sem sagt búið að hreinsa hana og laga að mestu og hún er vægast sagt mjög “impressive”.

Eftir skoðunartúrinn lá leiðin á enn einn veitingastaðinn, í þetta sinn Francies Italian Cusine. Þegar ég mætti voru flest ljósin slökkt, og það kom í ljós að helmingurinn af staðnum var rafmagnslaus! Sem betur fer var ennþá rafmagn á eldhúsinu og öðrum matsalnum (svo og kvennaklósettinu) svo ég settist niður og fékk mér lasagne sem var bara mjög fínt. Í eftirrétt fékk ég svo gómsætan ítalskan búðing með jarðarberjum… jömmí! 🙂

Á meðan ég beið eftir matnum spjallaði ég við einn þjóninn sem sagði mér að þetta hús væri eitt það elsta í bænum og ýmislegt sem á bjátaði. Það var meiri að segja svo að einn morguninn hefði einn ítalski frændinn (sem sér um að baka brauðin þeirra) mætt klukkan 6 og fundið alelda rafmagnsvíra! Eftir að hann hafði hringt á slökkviliðið hringdi hann svo í eigandann sem hrópaði upp yfir sig að hann hefði átt að láta staðinn brenna!! 🙂

Eftir matinn fór ég svo á plaggatasessjónið og spjallaði smá við fólk. Hitti tvo frá Stanford og tvö önnur sem annar þeirra þekkti. Svo kom yfirmaður Odyssey (sem er gervihnötturinn sem móttók mín gögn) og spjallaði aðeins, en hann er ekkert í ferlegu uppáhaldi hjá mér, og ég líklega ekki hjá honum. Oh well.

Þegar ég var búin að standa mína klst plikt við plaggatið fór ég að skoða mig um en sá fátt ferlega áhugavert. Settist því niður og er núna að blogga, því það eina annað sem ég hef að gera er að lesa vísindagreinar, og eh, ég nenni því ekki! (Síðar: fór að taka til á desktoppnum því það var ekkert netsamband og rakst þá á Lemmings-leikinn. Næsti klukkutími þaut fram hjá! 🙂

Í fyrramálið ætla ég að leggja af stað á flugvöllinn um 8 leytið og verð komin heim til Kaliforníu um 2 eftir hádegi á staðartíma. Mikið verður það nú gott! 🙂

Þriðjudagur 13. mars 2007

Spennufall
Nóttin leið tíðindalaus og ég mætti sæmilega snemma á ráðstefnuna. Þar hlustaði ég á nokkra fyrirlestra um hvaða nýju upplýsingar hafa komið í ljós og munu koma í ljós með hjálp tækjanna um borð um gervihnöttinn MRO (Mars Reconnaissance Orbiter). Greinilega mikið í gangi og allir afskaplega kátir með sitt. Áhugavert samt að allir fyrirlesaranir voru yfirmenn stórra hópa. Ég hef séð minna af aumum doktorsnemum halda fyrirlestra, maður þarf greinilega að rækta garðinn áður en maður fær að halda 10 mín tölu.

Ég lét mig hins vegar hverfa rétt áður en síðasti parturinn af fyrirlestrunum hófst, því þá átti að fara að tala um jarðlög rétt einu sinni! Í staðinn gróf ég upp ágætan mexíkanskan veitingastað sem reyndist ferlega skemmtilega innréttaður, og maturinn var góður líka! Ég er farin að fíla þetta veitingastaðabrölt mitt! 🙂

En núna er maturinn í meltun og ég komin í spennufall og heldur syfjuð. Mætti aftur á hótelið, en þá var verið að þrífa herbergið, sem þýddi að ég sit í anddyrinu og bíð eftir að fá lak á rúmið. Ætla að leggja mig til að hafa orku í kvöldið, en stoppa stutt á “geimstöðinni” fyrst og fara í kannski einn túr eða svo áður en plaggata-dæmið hefst.