Mánudagur 22. desember 2003

Skjálfti, skjálfti

Ég (F) var á fundi í vinnunni þegar allt í einu reið yfir skjálfti. Skv. fregnum var hann 6.5 á Richter skalanum og átti upptök sín mitt á milli Los Angeles og San Francisco. Það mun vera um 3 tíma akstur héðan að upptökum hans (held ég) og því var hann ekki mjög sterkur hér. Menn fundu þó greinilega fyrir honum og gardínur í glugganum sveifluðust aðeins til (rétt svo). Nú vantar bara Ragnar Skjálfti birtist í sjónvarpinu… 🙂

Sunnudagur 21. desember 2003

Forriti, forriti

Þrátt fyrir fögur fyrirheit hjá mér um að skólinn væri “búinn” í síðustu viku, þá eyddum við Finnur helginni í að vinna fyrir leiðbeinandann minn… Finnur sem sagt tók að sér að uppfæra C/C++ forritið góða sem við unnum við í sumar sem safnar gögnum frá stóra Stanford útvarps-sjónaukanum (46 m í þvermál) og birtir á tölvuskjá í “rauntíma”, og þegar Finnur var búinn með sitt þá tók ég til við að skrifa Matlab forrit sem les gögnin og birtir í “ekki rauntíma”… Nú er bara að sjá hvernig fólkinu sem þarf að nota þetta líst á. Planið mun víst vera að hlusta eftir geimförunum sem eru að lenda á Mars núna á allra næstu dögum og vikum og þess vegna samþykktum við að fórna helginni í þetta. Hvað gerir maður ekki til að bjarga afturenda leiðbeinandans síns?! 🙂

En helginni var samt ekki alveg fórnað. Í gærmorgun fórum við á Return of the King ásamt Guðrúnu. Ætluðum að vera voða sniðug og mæta í morgun-bíó klukkan hálf ellefu (já, 10:30 fyrir hádegi) og sleppa við troðninginn og fá sæmileg sæti… en það fengu greinilega fleiri þá hugmynd því við enduðum á öðrum bekk!! Myndin var hins vegar stórkostleg, eins og maður vissi fyrirfram, og núna hef ég fína afsökun fyrir því að fara aftur seinna… 🙂

Um kvöldið fórum við síðan í heimsókn til Loga og Tassanee, en þau voru að halda upp á afmælin sín. Hann á afmæli 18. des og hún þann 25. des, svo 20. des hentaði vel. 🙂