Föstudagur 28. nóvember 2003

Pappírinn taminn

Eftir ágætis .php forritun í morgunsárið (sjálfboðavinna fyrir einn proffann – að sjálfsögðu unnin uppi í rúmi á lappanum), þá gengum við loksins í það að temja pappírsflóðið í íbúðinni. Flóð þetta er tilkomið af þeirri einföldu ástæðu að við nennum ekki að setja dót í möppur nema ca. 3-4 sinnum á ári, og á meðan safnast pappírinn bara í hauga á nokkrum vel völdum stöðum. En í dag voru haugarnir drepnir og núna er allt komið á sinn stað. Finnur meiri að segja tætti niður allar kreditkortaumsóknirnar og “Má ekki bjóða þér $2.5 dollara fyrir að versla við okkur?” tilboðin og í verðlaun bakaði ég fyrir hann kanelsnúða. 🙂

Ég er ekki frá því að mér líði aðeins betur á húsmóðurs-sálinni núna. 🙂

Upphitunar-jólin búin

Í gær var “thanksgiving” eða þakkagjörðardagurinn hérna í USA, sem er almennur frídagur. Til að halda upp á daginn fórum við til Guðrúnar og Snorra þar sem við hittum fleiri Íslendinga, átum á okkur gat og spiluðum Pictionary. Reyndar var voða skrítið að halda upp á svona útlenska hátíð, þetta var eiginlega bara eins og upphitunar-jól! Sérstaklega var skrítið að keyra til þeirra, því maður sá alveg fyrir sér að eftir mánuð (þegar alvöru jólin koma) þá eru allar líkur á því að veðrið verði alveg eins: kyrrt, léttskýjað, og 15 stiga hiti…

Í dag er svo líka frí! Jibbííí! 🙂